ޕެންކްރެއަސް ނުވަތަ ޗިސްމޭ ދުޅަވުމަކީ ކޮބާ؟
ޕެންކްރިއަޓައިޓިސް އަކީ ބަނޑުތެރޭގައި މައިދާގެ ފަހަތުގައިވާ ބޮޑު ގްލޭންޑެއް ކަމުގައިވާ ޕެންކްރިއަސް (ޗިސްމޭ) ދުޅަވުމެވެ. ޕެންކްރިއަސްގެ މައިގަނޑު ދެ މަސައްކަތެއް ވެއެވެ: އެއީ ކާ ތަކެތި ހަޖަމުކުރަން ބޭނުންވާ އެންޒައިމްތައް އުފައްދައި ގޮހޮރުގެތެރެއަށް ދޫކުރުމާއި، ހަށިގަނޑަށް ބޭނުންވާ ހަކަތަ އުފެއްދުމަށްޓަކައި ކާނާ ބޭނުންކުރާ ގޮތް ކޮންޓްރޯލް ކުރުމަށް ބޭނުންވާ އިންސިއުލިން ފަދަ ހޯމޯންތައް އުފައްދައި ލޭގެ ތެރެއަށް ދޫކުރުމެވެ.
ޕެންކްރިއަސް ދުޅަވުމުގެ މައިގަނޑު ދެގޮތެއް ވެއެވެ:
ކުއްލިގޮތަކަށް ޕެންކްރެއަސް ދުޅަވުން ނުވަތަ އެކިއުޓް ޕެންކްރިއަޓައިޓިސް :
މިއީ ކުއްލިއަކަށް ޕެންކްރިއަސް ދުޅަވުމުގެ އަލާމަތްތައް ފާޅުވުމެވެ. މިއީ ތަންކޮޅެއް އާދައިގެ ގޮތަކަށް ކުޑަކޮށް ބަލިވުމަށްފަހު ވަރަށް އަވަހަށް ރަގަޅުވެދާފަދަ ގޮތަކަށް ދިމާވެދާނެ ކަމެކެވެ. ނަމަވެސް އަނެއްބައިފަހަރު ވަރަށް ބޮޑަށް ބަލިވުމާއެކު ފުރާނައަށްވެސް ނުރައްކާވާފަދަ ސީރިއަސް ހާލަތަކަށް ގޮސް އައިސީޔޫގައި އެނދުމަތިކުރަން ޖެހިދާނެވެސް ބައްޔެކެވެ. ރަގަޅަށް އަވަހަށް ފަރުވާ ދެވިއްޖެނަމަ މިބަލިން ވަރަށް ގިނަ މީހުން ރަގަޅުވެ ހޮސްޕިޓަލުން ގެއަށް ފޮނުވާލެވެއެވެ.
ދިގުމުއްދަތަކަށް ދެމިގެންދާ ޕެންކްރިއަސް ދުޅަވުން ނުވަތަ ކްރޯނިކް ޕެންކްރިއަޓައިޓިސް:
މިވައްތަރުގައި ޕެންކްރިއަސް ދުޅަވެފަ ރަގަޅުވުމުގެ މަރުހަލާ ތަންކޮޅެއް ދިގުދެމިގެން ދެއެވެ. ނުވަތަ ދުވަސްކޮޅުކޮޅުން ޕެންކްރެއަސް ދުޅަވުމުގެ އުދަގޫ އުފުލަން ޖެހިދެއެވެ. މިއީ ގިނަފަހަރު ކުއްލި ދުޅައަކަށްފަހު އެމައްސަލަ ތަކުރާރުވަމުން ދިއުން ކަމަށްވެސް ވެދާނެއެވެ. މި މައްސަލަ ގިނައިން ދިމާވަނީ ގިނައިން އަލްކޮހޮލް ބުއިމުގެ ސަބަބުން ކަމަށް ދިރާސާތަކުން ދައްކައެވެ. އަދި މީގެ ސަބަބުން ޕެންކްރިއަސް ގެ މަސައްކަތަށް ދާއިމީ ގެއްލުމެއް ލިބުމަކީ އެކަށީގެންވާ ކަމެކެވެ.
ޕެންކްރިއަސް ދުޅަވަނީ ކީއްވެ؟
ޕެންކްރިއަސް ދުޅަވުމަށް މެދުވެރިވެދާނެ ވަރަށްގިނަ ސަބަބުތައްވެއެވެ. އޭގެ ތެރޭގައި ހިމެނެނީ:
ފިތުގައި ނުވަތަ އެއާ ގުޅިފައިވާ ބައިލް ހޮޅިތަކުގައި ހިލަ އުފެދުން:
ހިލަ އުފެދުމުގެ ސަބަބުން ބައިލް ހޮޅިތައް (ފުރަމެއިން އުފައްދާ ބައިލް ދަތުރުކުރާ ހޮޅިތައް) ބަންދުވެ، ޕެންކްރިއަސް އިން އުފައްދާ އެންޒައިމްތައް ކުޑަ ގޮހޮރަށް ވާސިލްވުން ހުއްޓިދެއެވެ. ސަބަބަކީ ޕެންކްރިއަސް ގައި އުފައްދާ، ކާތަކެތި ހަޖަމު ކުރުމަށް ބޭނުންކުރާ އެންޒައިމްސްތައް ހިމަގޮހޮރާ ހަމައަށް ގެންގޮސްދޭ ހޮޅި (ޕެންކްރެއަޓިކް ޑަކްޓް) ވެސް ހިމަގޮހޮރާހަމައަށް ދިއުމުގެ ކުރިން ގޮސް ގުޅެނީ މި ދެންނެވި ބައިލް ދަތުރުކުރާ މައި ހޮޅިއާ އެވެ. މީގެ ނަތީޖާއެއްގެ ގޮތުން ޕެންކްރިއަސްގެ މައިހޮޅި ބަންދުވެ އެ ގުނަވަނުގައި ފެން ޖަމާވެ ދުޅަވާގޮތް ވެއެވެ. މިއީ ދިވެހިރާއްޖޭގައި ޕެންކްރިއަސް ދުޅަވުމަށް މެދުވެރިވާ އެންމެ މައި ސަބަބުވެސް މެއެވެ.
ގިނައިން ރާ ނުވަތަ އަލްކޮހޮލް ބުއިން:
އަލްކޮހޮލް ބުއިމަކީ އޭގެ ސަބަބުން ޕެންކްރިއަސްގެ ސެލްތައް ހަލާކުކޮށްލާ ކަމެއްކަމަށް ދިރާސާތަކުން ދައްކައެވެ. ސެލްތައް ހަލާކުވާން ފެށުމުން އެ އިން އުފައްދާ ހަޖަމު ކުރުމަށް ބޭނުންކުރާ އެންޒައިމްސްތައް ލީކުވެ އެ އެންޒައިމްސް ތައް ޕެންކްރިއަސް އިން ބޭރަށް ނިކުމެއެވެ. ނަތީޖާއެއްގެ ގޮތުން ޕެންކްރިއަސް ދުޅަވެ އޭގެ ކައިރީގައި ފެން ޖަމާވެ ކައިރީގައިވާ އެހެން ގުނަވަތަކަށް މި ދުޅައިގެ އަސަރު ކުރަން ފަށައެވެ. ވުމާއެކު އަލްކޮހޮލް ބުއިމަކީ ޕެންކްރިއަސް ދުޅަވުމުގައި ވަރަށްބޮޑު ރޯލެއް އަދާ ކުރާ ކަމެކެވެ.
ބައެއް ބޭސްތައް:
މިސާލަކަށް ހުޅުތަކުގައި ރިއްސުން ނުވަތަ އަރތްރައިޓިސް ފަދަ ކަންކަމަށް ދޭ ބޭހާއި ބައެއް ކަހަލަ ކެންސަރުގެ ފަރުވާގެ ގޮތުގައި ދޭ ކީމޯތެރަޕީ ބޭސްވެސް މީގެ ތެރޭގައި ހިމެނެއެވެ. މިފަދަ ކޮންމެ ބޭހަކީ ޕެންކްރިއަސް ދުޅަކޮށްފާނެ ބޭހެއް ނޫނެވެ. މި ބޭސްތަކުން ޕެންކްރިއަސްގެ ސެލްތަކުގެ ނިއުކްލިއަސް އަށް އަސަރުކުރުމުގެ ސަބަބުން އެ ސެލްތައް ހަލާކުވެ އޭގެ ސަބަބުން ޕެންކްރިއަސް ދުޅަވުން ނުވަތަ އޭގެ މަސައްކަތް ގެއްލޭގޮތްވެއެވެ.
ލޭގައި ޓްރައިގްލިސެރައިޑްގެ މިންވަރު މަތިވުން:
ކޮލެސްޓެރޯލްގެ ބައެއް ވައްތަރު ލޭގައި ގިނަވުމަކީވެސް ޕެންކްރިއަސް ދުޅަވުމަށް މެދުވެރިވެދާނެ ސަބަބެކެވެ. އާއްމުގޮތެއްގައި ޓްރައިގްލައިސެރައިޑް އިތުރުވުމަކީ ހަށިގަނޑުގެ ސިސްޓަމްތަކުގައި ފެންޖަމާވެ ދުޅަވުން ނުވަތަ އިންފްލަމޭޝަން ވުމަށް މެދުވެރިވާ ސަބަބެކެވެ. މިފަދަ އިންފްލަމޭޝަންތަކުގެ އަސަރު ޕެންކްރިއަސް އަށް ދިމާވުމަކީ ވަރަށްގިނައިން ފާހަގަކުރެވޭ ކަމެކެވެ.
ލޭގައި ކެލްސިއަމްގެ މިންވަރު މަތިވުން:
ކެލްސިއަމް މަތިވުމުގެ ނަތީޖާއެއްގެ ގޮތުން ޕެންކްރިއަސްގެ ހޮޅިތަކުގައި ނުވަތަ އެ ގުނަވަނުގައި ކެލްސިއަމްގެ އެތިކޮޅުކޮޅު ހަރުލަމުންގޮސް އޭގެ ސައިޒުބޮޑުވެ ޕެންކްރެއަސްގެ ހޮޅިބެދޭގޮތް ވުމަކީވެސް އެ ގުނަވަން ދުޅަވުމަށް މެދުވެރިވެދާނެ ސަބަބެކެވެ. އަދި ހަށިގަނޑުގެ ތެރޭގައި ކެލްސިއަމް އިތުރުވުމަށް މެދުވެރިވެދާނެ އެހެން ސަބަބު ތައް ވެއެވެ. އޭގެ ތެރޭގައި ޕަރަތައިރޮއިޑް ގްލޭންޑްގެ ހޯމޯން ލެވެލް މައްޗަށް ދިއުން ފަދަ ސަބަބުތައް ފާހަގަކުރެވެއެވެ.
ޢާއިލާއިން ވާރުތަވުން:
ވާރުތަވާ ޖީންތަކުގެ ސަބަބުން ޕެންކްރިއަސް ދުޅަވުމުގެ ފުރުސަތު އިތުރުވެއެވެ. ދިރާސާތަކުން ދައްކާގޮތުގައި (PRSS1) ނަމަކަށް ކިޔާ ވާރުތަވަމުން އަންނަ ޖީން އަށް އަންނަ ބަދަލުތަކުގެ ސަބަބުން ޕެންކްރެއަސް ދުޅަވުމަކީ އެންމެ ގިނަ އިން ފެންނަ ވައްތަރެވެ. ނަމަވެސް މިކަމުގައި ފާހަގަ ކުރެވިފައިވާ މި ނޫން ޖީންތައްވެސް ހިމެނެއެވެ.
ބަނޑަށް ލިބޭ އަނިޔާ ނުވަތަ އޮޕަރޭޝަންގެ ސަބަބުން ޕެންކްރެއަސް ދުޅަވުން:
އެކްސިޑެންޓް ތަކުގައި ބަނޑަށް ލިބޭ އަނިޔާތަކުގެ ސަބަބުން ޕެންކްރެއަސް އަށް އަނިޔާވުމަކީ އެހާގިނައިން ފެންނަ ކަމަކަށް ނުވިއަސް ޕެންކްރެއަސް އަށް އަނިޔާ ވެއްޖެނަމަ އޭގެ ސަބަބުން ބަލިމީހާ ގެ ހާލަތު ސީރިއަސް ވުމަކީ ވަރަށް އެކަށީގެންވާ ކަމެކެވެ. އަނިޔާގެ ސަބަބުން ޕެންކްރެއސް އިން އުފައްދާ ހަޖަމު ކުރަން ބޭނުންކުރާ އެންޒައިމްސް ތައް ބަނޑުތެރެއަށް ލީކުވުމަކީ މި ގޮތުން ދިމާވާނެ އެންމެ ނުރައްކާތެރި މައްސަލައެވެ. މި އެންޒައިމްގެ ސަބަބުން ކައިރީގައިވާ އެހެން ގުނަވަންތައްވެސް ޑައިޖެސްޓްވާން ފަށައެވެ.
އޮޓޯއިމިއުން:
ހަށިގަނޑުގެ ދިފާއީ ސިސްޓަމް އަމިއްލައަށް އުފައްދާ ޕެންކްރިއަސް އާ އިދިކޮޅު މާއްދާތަކުގެ ސަބަބުންވެސް ޕެންކްރިއަސް ދުޅަވާގޮތް ވެއެވެ. މިއީ ދިފާއީސިސްޓަމަށް އަށް އޮޅުމަކުން ކުރެވޭ ކަމެކެވެ. ދިފާއިސީސްޓަމްގެ މަސައްކަތަކީ ހަށިގަނޑުގެ ގުނަވަންތައް ރައްކާތެރިކޮށް ބެލެހެއްޓުމާއި އަދި ގުނަވަނަކަށް ގެއްލުންދީފާނެ މާއްދާތައް ނައްތާލުންވެސް މެއެވެ. ނަމަވެސް މި ހާލަތުގައި ދިފާއީ ސިސްޓަމް އަށް ލިބޭ ނުބައި މައުލޫމާތެއްގެ ސަބަބުން ޕެންކްރެއަސް އާ އިދިކޮޅު މާއްދާތައް އުފެއްދުމުގެ ނަތީޖާއެއްގެ ގޮތުން ޕެންކްރެއަސް ދުޅަވެއެވެ.
ޖަރާސީމު އަށަގަތުން:
ބެކްޓީރިއާ ނުވަތަ ވައިރަސް އަދި ބައެއްފަހަރު ފަންގަލް އިންފެކްޝަންތަކުގެ ސަބަބުން އެފަދަ އެއްޗެހިން އުފައްދާ ވިހައިގެ އަސަރު ފޯރުމުންވެސް ޕެންކްރިއަސް ދުޅަވެދާނެއެވެ. އިންފެންކްޝަން ގެ ސަބަބުން ޕެންކްރިއަސް ދުޅަވުމަކީ އެހާ ގިނައިން ފެންނަ ކަމަކަށް ނުވިއަސް މިއީ ވަރަށް ނުރައްކާތެރި ދުޅަވުމެކެވެ. މި ފަދަ ވިހައިގެ އަސަރު ލޭގެ ތެރެއަށް ދިއުމުން އޭގެ އަސަރު އެހެން ގުނަވަންތަކަށް ފޯރައެވެ. އޭގެ ސަބަބުން ބަލިމީހާގެ ފުރާނައަށް އަށްވެސް ނުރައްކާ ވެދާނެއެވެ.
ބައެއް ހާލަތްތަކުގައި ފާހަގަ ކުރެވޭ އެއްވެސް ސަބަބެއްނެތިވެސް ޕެންކްރިއަސް ދުޅަވެއެވެ. ދިރާސާވެރިން ހާމަކުރާގޮތުގައި ޕެންކްރިއަސް ދުޅަވާމީހުންގެ ތެރެއިން 15 – 20 އިން ސައްތަ މީހުންގެ ޕެންކްރިއަސް ދުޅަވުމުގެ ފާހަގަކުރެވޭ ސަބަބެއް ނުވެއެވެ.
ޕެންކްރިއަސް ދުޅަވުމުގެ އަލާމާތްތަކަކީ ކޮބާ؟
ޕެންކްރިއަސް ދުޅަވާ މީހުންގެ ކުރާ ޝަކުވާތައް ބައެއް ހާލަތްތަކުގައި ތަފާތުވެދާނެއެވެ. ނަމަވެސް އާންމު އަލާމާތްތަކުގެ ތެރޭގައި ހިމެނެނީ
– ކުއްލިއަކަށްވާ ޕެންކްރިއަސްގެ ދުޅަ:
ބަނޑުގެ މަތީ ބައިގައި ރިއްސުން، އަދި މި ރިއްސުން ބުރަކަށްޓަށްވެސް ފެތުރިދާނެއެވެ.
މޭ ނުބައިކުރުމާއި ހޮޑުލުން
ހުން އައުން
ހިތުގެ ވިންދު އަވަސްވުން
ބަނޑުގައި އަތްލުމުން ރިހުން ގަދަވުން
ބަނޑު ފުއްޕާލުން
– ދިގުމުއްދަތަކަށް ދެމިގެންދާ ޕެންކްރެއަސްގެ ދުޅަ:
ބަނޑުގެ މަތީ ބައިގައި ދެމިގެންދާ ރިއްސުމެއް ހުރުން އަދި މި ރިއްސުން ކެއުމަށްފަހު ބޮޑުވެދާނެއެވެ
ބަރުދަން ލުއިވުން
ތެޔޮއެކުލެވޭ ވަސްގަދަ ބޮޑުކަމުދާ ތަކެތި ލެވުން
ބަނޑުދިޔާވުން
ބަނޑަށް އުނދަގޫވުމާއި ހޮޑުލުން
ސިއްހީ އެހީ ހޯދަންވީ ކޮން ވަގުތެއްގައި؟
ޕެންކްރިއަސް ދުޅަވުމަކީ ވަރަށް ސީރިއަސް ހާލަތަކަށް ބަލިމީހާ ހިނގައިދާނެ ކަމަކަށް ވާތީ ކުރިން މިދެންނެވި ފަދަ ޝަކުވާ އެއް ކުރަން ފަށައިފިނަމަ (ކުއްލިއަކަށް ނުވަތަ ވަރަށްބޮޑަށް ބަނޑުގައި ރިހެން ފެށުން އަދި އެ ރިހުން ރަނގަޅުނުވާނަމަ) ވަގުތުން މެޑިކަލް އެހީތެރިކަން ހޯދަންވާނެއެވެ
ޕެންކްރިއަސް ދުޅަވުން ދެނެގަންނާނީ ކިހިނެއް؟
ޕެންކްރިއަސް ދުޅަވުން ދެނެގަތުމަށް ޑޮކްޓަރުން ތަފާތު ގޮތްތަކެއް ބޭނުންކުރެއެވެ:
ބަލިމީހާގެ ސިއްހީ ހިސްޓްރީ ނެގުމާއި އަތްލައިގެން ބެލުން:
ޑޮކްޓަރުން ބަލިމީހާގެ ޝަކުވާތަކާއި އަލާމާތްތަކާ ބެހޭގޮތުން ސުވާލުކުރުމަށްފަހު އަތްލައިގެން ބަނޑުބަލައި ފިޒިކަލް އެގްޒަމިނޭޝަނެއް ހަދާނެއެވެ. މި ކަންކަމަކީ ބަލި ދެނެގަތުމަށްޓަކައި ކުރާ އެންމެ މުހިއްމު އެއް ކަމެވެ.
ލޭގެ ޓެސްޓުތައް:
މިއީ ހަޖަމުކުރާ އެންޒައިމްތަކުގެ (އެމައިލޭސް އަދި ލައިޕޭސް) މިންވަރު ބެލުމާއި އަދި ފުރަމެއާއި، ކިޑްނީ އާއި އަދި އެހެނިހެން ލޭގެ ޓެސްޓުތަކެކެވެ. ޕެންކްރިއަސް ދުޅަވެފައިވާ މީހުންގެ މިދެންނެވި އެންޒައިމްތަކުގެ މިންވަރު މަތިވެއެވެ
އިމޭޖިންގ ޓެސްޓުތައް:
އަލްޓްރާސައުންޑް، ސީޓީ ސްކޭން، އަދި އެމްއާރްއައި ބޭނުންކޮށްގެން ޕެންކްރިއަސް ދުޅަވެފައިވާ މިންވަރު ބެލުމާއި، ޕެންކްރިއަސް ދުޅަވުމަށް މެދުވެރިވި ސަބަބު (ފިތުގައި ހިލަ ހުރުން ނުވަތަ އެހެނިހެން މައްސަލަތައް) މި ޓެސްޓް ތަކުން ދެނެގަނެވިދާނެއެވެ.
ޕެންކްރިއަސް ދުޅަވުމުގެ ފަރުވާ އަކީ ކޮބާ؟
ފަރުވާގެ އަމާޒަކީ އިންފްލަމޭޝަން ނުވަތަ ދުޅަވުން ކުޑަކުރުމާއި، ރިއްސުން ކުޑަކުރުމާއި، އަދި ކޮމްޕްލިކޭޝަންތައް ނުވަތަ ދިމާވެދާނެ ނުރައްކާތެރި ހާލަތްތައް ދިމާވުން ކުޑަކުރުމެވެ.
- ހޮސްޕިޓަލުގައި އެނދުމަތިކުރުން: ޕެންކްރިއަޓައިޓިސް އަކީ ބަލިމީހާ ނުރައްކާތެރި ހާލަތަކަށް ގެންގޮސްފާނެ ފަދަ ކަމަކަށް ވުމާއި އަދި ހާލަތު ވަރަށް އަވަހަށް ގޯސްވެދާނެ ފަދަ ބައްޔަކަށް ވާތީ ގިނަފަހަރު ހޮސްޕިޓަލްގައި އެނދުމަތިކުރަން ޖެހެއެވެ. އަދި ހާލަތު އިތުރަށް ގޯސްވާ ނަމަ އިންޓެންސިވް ކެއަރ ގައިވެސް ބާއްވާން ޖެހިދެއެވެ.
- އައި.ވީ ކޮށްދޭ ފެނާއި ބޭސް ދިނުން
- ރިއްސުން ކުޑަކުރުމަށް ބޭސްދިނުން
- ބައެއް ހާލަތްތަކުގައި، ވަގުތީގޮތުން ކެއުން ހުއްޓާލައި، ފީޑިންގ ޓިއުބެއް މެދުވެރިކޮށް ކާނާ ފޯރުކޮށްދިނުން.
- ބޭސްތައް:
- އިންފެކްޝަނެއް ހުރިނަމަ އެންޓިބައޮޓިކްސް .
- ކްރޯނިކް ނުވަތަ ދިގުދެމިގެންދާ ހާލަތްތަކުގައި ހަޖަމުކުރުމަށް އެހީވެދޭ ޕެންކްރިއަޓިކް އެންޒައިމް ސަޕްލިމެންޓްތައްދިނުން.
- ޑައިބެޓީސް ނުވަތަ ހަކުރު މަތިވެފައިވާނަމަ އިންސިއުލިން ދިނުން
- އީ.އާރް.ސީ.ޕީ (އެންޑޮސްކޮޕިކް ރެޓްރޯގްރޭޑް ކޮލެންޖިއޯޕެންކްރިއަޓޯގްރަފީ):
- މިއީ ގޯލްސްޓޯން ނައްތާލުމަށް ނުވަތަ ބައިލް އަދި ޕެންކްރިއަޓިކް ޑަކްޓްތަކުގައި ހުރި ބްލޮކޭޖްތައް ނުވަތަ ބަންދުތައް ފިލުވާލުމަށް ހަދާ ޕްރޮސީޖަރ އެކެވެ.
- ސަރޖަރީ:
- ޕެންކްރިއަސް ދުޅަވެފައިވަނީ ގޯލްބްލެޑަރ (ފިތު) ގައި ހުރި ހިލައިގެ ސަބަބުން ކަމަށް ވާނަމަ އޮޕެރޭޝަންކޮށް ގޯލްބަލޑަރ ނެގުމަކީ ކުރަން ޖެހޭނެ ކަމެކެވެ. ނަމަވެސް މި ފަދަ އޮޕެރޭޝަނެއް ކުރާނީ ބަލިމީހާގެ ހާލަތު ރަގަޅުވުމަށް ފަހު އެވެ.
- ޕެންކްރިއަސް ދުޅަވެ އިތުރު މައްސަލަތައް ދިމާވެ ޕެންކްރިއސްގެ ވަށައިގެން ފެން އުފެދުމާއި ޕެންކްރިއަސް ގެ ބައެއް މަރުވެ އެތަނުގައި ދޮސް އުފެދިއްޖެ ކަމަށްވާނަމަ ބަލިމީހާގެ ހާލަތު އިންތިހާއަށް ނުރައްކާވީއެވެ. މި ހާލަތުގައި އޮޕެރޭޝަނެއް ކުރުމަކީ އަދި އިތުރަށް ހާލަތު ގޯސްކޮށްފާނެ ކަމަކަށްވީނަމަވެސް ބަނޑުތެރޭގައި އުފެދިފައިވާ ދޮހާއި މަރުވެފައިވާ ޓިޝޫ ނަގައި ސާފުކުރުމަކީވެސް ކުރަންޖެހިދާނެ ކަމެކެވެ.
ޕެންކްރިއަސް ދުޅަވުމުގެ ސަބަބުން ކުރިމަތިލާން ޖެހިދާނެ މައްސަލަތައް:
– ޖަރާސީމު އަށަގަނެ އޭގެ ވިހަ ފެތުރުން (އިންފެކްޝަންތައް)
– ކިޑްނީ ފެއިލްވުން
– ނޭވާލުމުގެ މައްސަލަތައް. އޭގެ ތެރޭގައި ފުއްޕާމޭގައި ފެނާއި ދޮސް އުފެދުން ހިމެނޭ.
– ކާނާ މަދުވެ ހަށިގަނޑު އަނަރޫފަވުން.
– ހަކުރުބަލި ޖެހުން.
– ޕެންކްރިއަސްގެ ވަށައިގެން އުފެދޭ ފެންތައް ވަކި އޭރިއާއަކަށް ޖަމާވެ ކޮތަޅެއްގެ ސިފައިގައި އޮންނަންފެށުން (ސިއުޑޯސިސްޓް އުފެދުން).
– ޕެންކްރިއަސް ހަލާކުވެ އެ ގުނަވަނުގެ އޭރިއާތައް މަރުވެ ގިރިގެން ދިއުން. (ނެކްރޯސިސް)
– ޕެންކްރިއަސް އަށް ކެންސަރު ޖެހުން (ދިގު މުއްދަތުގައި).
ޕެންކްރެއަސް ދުޅަވުމުގެ ފުރްޞަތު ކުޑަކުރުމަށްޓަކައި ދިރިއުޅުމުގެ ވައްޓަފާޅިއަށް ގެނެވިދާނެ ބަދަލުތައް:
– ބަނގުރާ ބުއިން ހުއްޓާލުން: ބަނގުރާ ބުއިން މަދުކުރުން ނުވަތަ މުޅިން ހުއްޓާލުން.
– ދުންފަތުގެ އިސްތިޢުމާލު ކުރުން ހުއްޓާލުން: ދުންފަތުގެ އިސްތިޢުމާލުން ޕެންކްރިއަޓައިޓިސް ޖެހުމުގެ ރިސްކު އިތުރުވެއެވެ.
– ކާނާ: ޑޮކްޓަރު ނުވަތަ ޑައިޓީޝަންގެ ލަފާގެ މަތިން މަދުން ތެޔޮ ނުވަތަ ފެޓް ހުންނަ ކާނާ ނުކެއުން
– ބޭސްތައް: ޑޮކްޓަރު އަންގާފައިވާ ގޮތަށް ބޭސްތައް ބޭނުންކުރުން.
ޕެންކްރިއަސް ދުޅަވުމަކީ އާދައިގެ ބަނޑުގެ ރިއްސުމެއްގެ ގޮތުގައި ބެލުމަކީ ރަގަޅުކަމެއްނޫނެވެ. އޭގެ ސަބަބުން ފުރާނައަށްވެސް ނުރައްކާވެދާނެ ހާލަތަކަށް ބިލިމީހާ ދިއުމަކީ ވަރަށް ގާތުގައި އޮންނަ ކެމެކެވެ. ވުމާއެކު އެންމެ ރަގަޅުގޮތަކީ ޕެންކްރިއަސް ދުޅަވަން ދިމާވެދާނެ ފަދަ ކަންކަމުން ދުރުވުމާއެކު ފުރިހަމަ ސިއްހަތަކަށް މަގުފަހިކޮށްދޭނެ ފަދަ ގޮތަކަށް ދިރިއުޅުމުގެ ވައްޓަފާޅި ބަދަލުކުރުމެވެ.
